Smiley face

ዛሬ ሚስጢር ቢወጣ ችግር የለም!

( ጋዜጠኛ ፋሲል የኔዓለም)
የተባበሩት መንግስታት ድርጅት ዋና ጸሃፊ አንቶኒዮ ጉተሬዝ ከዶ/ር አብይ አህመድ ጋር በቤተመንግስት ሲጨባበጡ ሳይ በጣም ደስ አለኝ። ጉተሬዝን የዛሬ 5 ዓመታት ገደማ ጄኔቭ በጽ/ቤታቸው ከአንድ ሊቢያዊና አሜሪካዊ ጓደኛዬ ጋር አነጋግረናቸው ነበር። ከእርሳቸው ጋር ተነጋግረን ስንጨርስ ጋዳፊ መገደሉን የሚያሳይ ፊልም በቀጥታ በቲቪ ተላለፈ። ጓደኛዬን “ምን ተሰማህ?” ብለው ጠየቁት፤ “የሰው ልጅ ለዚህ አጭር እድሜው ያንን ሁሉ ግፍ መፈጸሙ ያሳዝናል፤ በዚህ መልኩ ባይሞት ደስ ይለኝ ነበር” የሚል ግሩም መልስ ሰጠ። ይህ ሊቢያዊ ጓደኛዬ በጋዳፊ ብዙ ስቃይ የደረሰበት ቢሆንም፣ ጋዳፊ ባሳዛኝና ውርደት በተሞላበት መልኩ ሲገደል ግን አልተደሰተም ነበር ። ጉተሬዝ ቀጠሉና ስለኢትዮጵያ ፖለቲካ ጠየቁኝ። የማውቀውን ተናገርኩ። በሁዋላ ስረዳ ግን፣ እድሜ ለአና ጎሜዝ፣ እርሳቸው ከእኔ በላይ ኢትዮጵያን ያውቋታል። መለስን እንደማይወዱት ነገሩኝ። በኢትዮጵያ የሚፈጸመውን የሰብአዊ መብት ጥሰት እነ አሜሪካ አይተው ዝም እንደሚሉ በቁጭት ገለጹ። ግን ደግሞ የሚሰሩበት መስሪያ ቤት የሚያስቡትን እንዳይናገሩ ይከለክላቸዋል። ከኤርትራ ጋር የተደረገውን ጦርነትም ትርጉም አልባ ብለውታል። ብቻ በአጠቃላይ ኢትዮጵያን ሲጎበኙ የሚያዩዋቸውን ችግሮች እያነሱ ብዙ ተናገሩ። በመጨረሻም የራሳቸውን የወጣትነት የትግል ተሞክሮ በማንሳት ጠንክረን እንድንታገል መከሩን። “ ፖርቱጋል ወደ ዲሞክራሲ እንድትሸጋገር ብዙ ሰዎች ተሰውተዋል። ለውጥ ማምጣት ቀላል አይደለም። እናንተም በጀመራችሁት መንገድ ቀጥሉ፤ በአገራችሁ ለውጥ ይመጣል፣ ታሸንፋላችሁ።”ብለውን ተለያዬን። ጉተሬዝ ዛሬ ከኤርትራ ጋር ያለው ግጭት በሰላም መጠናቀቁን ከዶ/ር አብይ አንደበት ሲሰሙ እንዲሁም በኢትዮጵያም ውስጥ ለውጥ እየመጣ መሆኑ ሲያዩ በእጅጉ እንደሚደሰቱ አምናለሁ። ከአና ጎሜዝ ቀጥሎ የኢትዮጵያ ወዳጅ ጉተሬዝ ናቸው። ሁለቱ ፖርቱጊዞች ክብር ይገባቸዋል።

Leave a Reply

Your email address will not be published. Required fields are marked *