Smiley face

አዲስ አበባ የአዲስ አበባውያን ናት!

አዲስ አበባ የአዲስ አበባውያን ናት።
(አቶ ነአምን ዘለቀ ፣ የአግ7 አመራር)

በብዙ ሚሊዮኖች የሚቆጠሩ ከሁለት ወይንም ከዚያ በላይ ብሄር/ዘር/ጎሳ የተወለዱ የአዲስ አበባ ነዋሪ ኢትዮጵያዊያን የአያት ቅደመ አያቶቻቸው እትብት ጭምር የተቀበረባት ዋና ከተማ ናት።

አዲስ አበባ የኦሮሞ፣ የአማራ፡ የጉራጌ፣ የደቡብ ብሄሮች ተወላጅ የሆኑ፣ ወዘተ፣ ኢትዮጵያዊያንም የሚኖሩባት፣ ሁሉም እኩል መብትና ባለቤትነት አላቸው ስንል፣ አይ አይደለም የዚህ ወይንም የዚያ ብሄር የተለየ ባለቤትነት በአዲስ አበባ ላይ አለው የሚሉ የትኛው ዘመን ላይ እንደሚኖሩ ማጠራጠሩ ብቻ ሳይሆን ይህን በብዙ መስዋእትነት የመጣን ለውጥ ከማገዝ ይልቅ እንዲህ አይነት ህዝብ ስጋት የሚጥል፣ በማህበረሰቦች መካከል ከአብሮነት ይልቅ መነጣጠልን፡ ከመቀራረብ ይልቅ ጥርጣሬና ቅራኔን የሚያፋፍም የጋራ መግለጫ ለማውጣት ለምን አስፈልገ የሚል ጥያቄ መጠየቅ የግድ ይላል።

ወቅቱ የሚጠይቀው ስላምን፣ እርቅን፣ ሀገራዊ መግባባትን፣ ብሎም የዶ/ር አብይ መንግስት የጀመረውን ለውጥ ሂደት ማገዝ መሆን ሲገባው፣ እነዚህ ድርጅቶች ይህን መሰል ሰሞኑን የተፈጠረውን አሳዛኝ ሁኔታ የሚያባብስ አቅጣጫ ለመከተል መምረጣቸው በጣም ያሳዝናል። እጅግ አስገራሚም ነው።

የእኛ አቋም ግልጽ ይመስለኛል። በሁሉም አካባቢ ፣ በሁሉም የኢትዮጵያ ማእዘኖች የእያንዳንዱ ኢትዮጵያዊ ዜጋ እኩል መብትና ጥቅም እንደ ዜጋ ይኑረው ስንል ኦሮሞ ኢትዮጵያውያን፣ የደቡብ ኢትዮጵያውያን፣ የሶማሌ ኢትዮጵያዊያን፣ የአማራ ኢትዮጵያውያን፣ ከሁለት ወይንም ከዚያ በላይ የተወለዱ ኢትይጵያዊያን ፣ ብሎም ሁሉም የኢትዮጵያ ዜጎች እንደ ዜጋ በጎንደርም ሆነ በደቡብ፣ በአዲስ አበባም ሆነ በወሎ ፣ በአዋሳም ሆነ፣ በድሬዳዋ እኩል መብቶችና ነጻነቶች የተረጋገጡበት፣ የተከበሩበት ዲሞክራሲያዊት ኢትዮጵያ ማለታችን ነው። ህብረ ብሄራዊ ማንነት ያላቸው ኢትዮጵያውያንም ሆነ ከአንድ ብሄር ወይ ሌላ የተወለዱ ዜጎች በየትኛው አካባቢ እኩል የዜግነት መብቶቻቸው ፣ ጥቅሞቻቸው መከበር፣ መጠበቅ አለበት እያልን ነው።

የብዙ ሚልዮኖች ቤትና ህብረ ብሄራዊ ማንነት ያላትን የሀገሪቱን መዲና አዲስ አበባን የአንድ ብሄረ የተለየ ርስት አድርጎ የተለየ የባለቤትነት መብት መስጠት እጅግ ሃላፊነት የጎደለው ነው። ነገ ደግሞ ሌሎች በልዩ ልዩ አካባቢዎች ተንስተው የዛሬ 100 አመት ወይን 500 እመት ይህ የአንተ መሬት አልነበረም፣ መጤ ነህ፣ ሰፋሪ ነህ በሚል ህዝቦችን ወደ የማያባራ ትርምስ እንዲያመሩ በለፉት 27 አመታት በየጊዜው የፈነዳውን አሳዛኝና ዘግናኝ የማህበረሰቦች ግጭት የሚያባብስ አካሄድ እንጂ፣ እቺን አሳዛኝ ሀገርና ለመከራ የተፈጠረ ህዝብ በጋራ እንዲኖር፣ መብቱ፣ ነጻነቱና፣ ሰበአዊ ክብሩ የተሟላባት ለሁሉም እኩል ለሆነች ዴሞክራሲያዊት ኢትዮጵያ ምስረታ ሂደት የሚረዳ ጤነኛ አስተሳስብ ሊሆን የሚችል አይደለም።

አሁንም የምንለው ከግልና ከትናንሽ የፓለቲካ ትርፍ ስሌት ወጥተን ለሁሉም ህዝብና ማህበረሰቦች አብሮነት፣ ለጋራ ሀገር ለጋራ የህዝቦች ጥቅም፣ ለሰላም፣ ለመረጋጋት፣ ልዩነቶች በሰለጠነ የዴሞክራሲያዊ ውይይት የምንፈታበት ለተረጋጋ የፓለቲካ ስርአት ምስርታ በጋራ ብንበረታ፣ ብሎም የለውጡ ሃይል የጀመረውን ሂደት ለማገዝ ብንረባረብ የተሻለ ነው በማለት ዳግም ምክር ለመለገስ እወዳለሁ። ይህ አካሄድ ለማንም የማይጠቅም፣ ማንም አትራፊ የማይሆንበት፣ ሁሉ ተያይዞ ወደ ሁለንተናዊ ኪሳራ፣ ብሎም የማያባራ ገሀነም ሊወስደን የሚችል የጥፋት ጎዳና ነው።

Leave a Reply

Your email address will not be published. Required fields are marked *